Ravisez m'tiête, em' pauf caboche. J'ai cor bien du mal et pourtant j'rigole parce que j' n'ai point souffert comme mes comarades. On vient de m’raconter leu histoire et leu sauv'tache miraculeux. Ces loques qui intourent m’tête, ch'est cor un béguin, un béguin d'mineur, mais blanc cette fois chi. Ch’est rien du tout. Alors em' v'la sorti de m'prison d'carbon. Em' pauf tite femme all' est là et all' m'croyait bien perdu.
Té vas inl'ver t'robe noirte, hein Isabelle. N'impêche que t'à l'heure t'as déjà voulu em' batte.
O' savez, monsieur, ches femmes ch'est vraimint d'z'animaux domestiques formidapes. N'in v'là eun' qui Pinsot jamais m'rvoir.
Au bout d'vingt six jours j'déboule comme eun' espèce ed' fantôme noir. Em' première invie, ch'est de m'laver, d'foute in l'air toute cette crasse ed'carbon qui ma fait comme eun' deuxième peau. A peine sorti de ch'trou, j'demande un seau d'eau et sous prétexte de m'laver, madame all' commence à m’donner des coups d'poing, alorss j'li dis
Ah nan, attinds un peu. Ne m'bats pas tout d'suite, ou bien j'ardévale dins l' fosse pour cinq ans : Tiens ravisez-le l’sang coeur, all' rigole.. Allez, donne chelle tasse ed café. Té n'y a pas mis du poison au moins ? Allez, viens m' faire eun' baisse.
Em' n'histoire, el' v'là. J'ouvros dins l' veine Marie rinversée. On était 34. ch'l'équipe de ch' porion Grandam. Mi, j'piquais à l'veine. V'lan ! Un coup d'canon qui part, un déplach’mint d'air formidape.
J'in ai min tympan mécanisé. Mais, quo qu' ch'est ? Mes orelles all' bourdonnent. Mais tout y passe in un clin d'oeul. J'ravise à l'intour ed' mi..Tout l' monte est tranquille. In arprind l’travail. Mais au bout d'quèques minutes, v'là qu'in intind des cris, et comme eun' galopate dins toutes ches voies. Cha n'n’est qui s'insauvent. Alors, nous in s'fait de l'bile, Allons voir chu qu'i s'passe ! In jette les outils et in court. Pis, d'un seul coop, in s'arrête, surpris de ce qu'on vient d'faire, on s’regarde, y’a en qui rigolent !
Alors sans savoir pourquoi, in vit, in reste là, tranquilles et in écoute, tout d’même un tiot peu rassurés parce qu'on n'intind pus rien.
Alors ch'chef porion, i sort eun' grosse oranche de s’poche et y’in donne des quartiers à ceux qui sont à côté d'li. J'ai eu m' part. Cha nous met in appétit. In décide d'faire briquet et in sort ches tartines.
Mais, quo qu’chest qu'i nous arrife là ? D'un seul cop v'là qu'in n' respire pus. Cha pue. Ches lampes i baissent. Y in a deux ou tros qui s'étindent. On comminche à s’ronguer les sangs. Mais ches gosses, sans savoir pourquoi, un sale galibot surtout, i s'mettent à rire. Mi qui aime rigoler d'habitute, je n'sais point pourquoi, j'ai des mauvaisses pinsées, comme eun'
lumière dins m'chervelle et j'leur dis : ah mes paufs amis , n'rigolez point. D't'a l'heure, y aura des veuves et des orphelins. Pourquoi que j'dijos cha ? J'vous jure qutj'in savos rien, mais j'avos quand même raison, in va l'voir ! El frousse all'nous prind, in s'insauve à travers. Mi, j'm'tire avec min cousin Auberger. on court tant qu'in peut. Em’tiête all' tourne. Min gosier me râpe. Ej' sus comme
étourdi. Je tombe, min cousin i m'arlève et in r'part. je r’tombe eun' deuxième fos. Tout i tourne. Mes forches all' s'in vont d’plus in plus et mes jambes all 'm tiennent pus d'bout . j’tombe sur l'dos mes bras in croix et les yeux presque fermés. Min cousin Auberger i ressaie d'm'arléver eun' deuxième fois. I n' peut point.
I renonce. Peut-ête qu'i m' crot mort. I m'laisse là et i s'saufe.
Mes yeux i s’troublent. Tous les copains passent sur mi et j'vois min galibot, Jules Lesyre qui fonce sur mi, i marche sur mi et i m’écrase em' figure avec les clous d'ses bottines. J'tombe dins les pommes. Combien d'temps que j'sus resté comme cha, je ne l'saurai jamais.
Pourquoi que j'sus pas mort à ch'momint-là ? Ch'est peut-ête parce qu' j'étos au sol et que ch'mauvais gaz i est monté vers la voûte. Je m'réveille pourtant.
Tout i est noir, tout i est silence !
Y a quéqu'un ?
El fosse all' est vide,. J'sus tout seu! J’commence à vomir. J'ai cherché à l'aveugle el’chemin d'l'accrochache et j'sus arrivé dins l' bowette où j’ai trouvé un peu d'eau qu'j'ai bu eun' vingtaine ed' fois. Fatigué, j'ai culbuté eun' berline pleine d'carbon, j'm'a couché d'dins et j'm'suis endormi. Quand j'm'suis réveillé j'avos faim. Je m'sus r’mis à errer, m'butant dins les boisages. Final'mint, j'ai culbuté un cheval mort. A côté d'li y avot eune hache et j 'ai pu in couper un morceau.
Mais l'carne, all était si dure et all' puot tellemint que j'n'a pas pu l’minger. J"avais pas idée depuis combien de temps qu'j'étos infermé.
In cherchant bien, j'ai fini par trouver l' pain d'un galibot. mais i étot dur et moisi.
Et j' m'a cor endormi.
He ho ! Y a quéqu t un ? J'sus tout seu ?
Dins l'noir j'sus arrivé à eun' déchindrie et j' m'a laissé glisser tant qu'j'ai pu, et j'sus arrivé à l'veine Joséphine où j'ai trouvé des briquets qui étaient pindus dins un coin. J'sus arvénu à l'déchindrie qu' j'ai armontée. J'avos froid et j'm'a couvert avec les loques trouvées sur le morts. Ch'est comme cha qu'j'ai pu m'in sortir. J'ai pris aussi les bottines d'un comarade, les miennes elle z’étaient usées et elles m’faisaient mal. Pis j'ai trouvé trois montres et quate sous qu'j'ai mis dins m'poche.
Au s'cours !
Sauvez-me !